PEKINO — La sanministerio de la ŝtato Espirito Santo, Brazilo, anoncis marde, ke la ĉeesto de IgG-antikorpoj, specifaj kontraŭ la viruso SARS-CoV-2, estis detektita en serumaj specimenoj de decembro 2019.
La sanministerio diris, ke 7 370 serumspecimenoj estis kolektitaj inter decembro 2019 kaj junio 2020 de pacientoj suspektataj je infekto per dengo kaj ĉikungunjo.
Kun la analizitaj specimenoj, IgG-antikorpoj estis detektitaj en 210 homoj, el kiuj 16 kazoj sugestis la ĉeeston de la nova koronaviruso en la ŝtato antaŭ ol Brazilo anoncis sian unuan oficiale konfirmitan kazon la 26-an de februaro 2020. Unu el la kazoj estis kolektita la 18-an de decembro 2019.
La sanministerio diris, ke necesas ĉirkaŭ 20 tagoj por ke paciento atingu detekteblajn nivelojn de IgG post infekto, do la infekto povus esti okazinta inter malfrua novembro kaj frua decembro 2019.
La brazila ministerio pri sano instrukciis la ŝtaton fari profundajn epidemiologiajn esplorojn por plia konfirmo.
La trovoj en Brazilo estas la plej novaj inter studoj tutmonde, kiuj aldoniĝis al kreskanta evidenteco, ke COVID-19 silente cirkulis ekster Ĉinio pli frue ol antaŭe pensite.
Esploristoj de la Universitato de Milano ĵus malkovris, ke virino en la norditala urbo estis infektita per COVID-19 en novembro 2019, laŭ amaskomunikilaj raportoj.
Per du malsamaj teknikoj sur haŭta histo, la esploristoj identigis en biopsio de 25-jaraĝa virino la ĉeeston de RNA-gensekvencoj de la viruso SARS-CoV-2 devenantaj de novembro 2019, laŭ la itala regiona ĉiutaga gazeto L'Unione Sarda.
“Ekzistas, en ĉi tiu pandemio, kazoj en kiuj la sola signo de COVID-19-infekto estas tiu de haŭta patologio,” diris Raffaele Gianotti, kiu kunordigis la esploradon, citite de la gazeto.
“Mi scivolis ĉu ni povus trovi signojn de SARS-CoV-2 en la haŭto de pacientoj kun nur haŭtmalsanoj antaŭ ol la oficiale agnoskita epidemia fazo komenciĝis,” diris Gianotti, aldonante “ni trovis 'la fingrospurojn' de COVID-19 en la haŭta histo.”
Surbaze de tutmondaj datumoj, ĉi tio estas "la plej malnova pruvo pri la ĉeesto de la viruso SARS-CoV-2 en homo", diris la raporto.
Fine de aprilo 2020, Michael Melham, urbestro de Belleville en la usona ŝtato Nov-Ĵerzejo, diris, ke li testis pozitive por COVID-19-antikorpoj kaj kredis, ke li kontraktis la viruson en novembro 2019, malgraŭ la raportita supozo de kuracisto, ke tio, kion Melham spertis, estis nur gripo.
En Francio, sciencistoj trovis, ke viro estis infektita per COVID-19 en decembro 2019, proksimume monaton antaŭ ol la unuaj kazoj estis oficiale registritaj en Eŭropo.
Citante kuraciston ĉe la hospitaloj Avicenne kaj Jean-Verdier apud Parizo, BBC News raportis en majo 2020, ke la paciento "devas esti infektita inter la 14a kaj 22a de decembro (2019), ĉar simptomoj de koronaviruso bezonas inter kvin kaj 14 tagojn por aperi."
En Hispanio, esploristoj ĉe la Universitato de Barcelono, unu el la plej prestiĝaj universitatoj de la lando, detektis la ĉeeston de la virusa genaro en kloakakvaj specimenoj kolektitaj la 12-an de marto 2019, la universitato diris en deklaro en junio 2020.
En Italio, esploro de la Nacia Kancera Instituto en Milano, publikigita en novembro 2020, montris, ke 11.6 procentoj el la 959 sanaj volontuloj, kiuj partoprenis en pulmakancera ekzamena testo inter septembro 2019 kaj marto 2020, evoluigis COVID-19-antikorpojn longe antaŭ februaro 2020, kiam la unua oficiala kazo estis registrita en la lando, kun kvar kazoj el la studo datiĝantaj de la unua semajno de oktobro 2019, kio signifas, ke tiuj homoj estis infektitaj en septembro 2019.
La 30-an de novembro 2020, studo de la usonaj Centroj por Malsankontrolo kaj Preventado (CDC) trovis, ke COVID-19 verŝajne estis en Usono jam meze de decembro 2019, semajnojn antaŭ ol la viruso unue estis identigita en Ĉinio.
Laŭ la studo publikigita rete en la revuo Clinical Infectious Diseases, esploristoj de CDC testis sangospecimenojn de 7 389 rutinaj sangodonacoj kolektitaj de la Usona Ruĝa Kruco de la 13-a de decembro 2019 ĝis la 17-a de januaro 2020 por antikorpoj specifaj kontraŭ la nova koronaviruso.
COVID-19-infektoj "eble ĉeestis en Usono en decembro 2019", ĉirkaŭ monaton pli frue ol la unua oficiala kazo de la lando la 19-an de januaro 2020, skribis la sciencistoj de CDC.
Ĉi tiuj rezultoj estas ankoraŭ plia ilustraĵo pri kiom komplike estas solvi la sciencan enigmon de spurado de virusfonto.
Historie, la loko kie viruso unue estis raportita ofte montriĝis ne esti tiu de ĝia origino. La HIV-infekto, ekzemple, unue estis raportita de Usono, tamen eble ankaŭ eblas, ke la viruso ne ŝuldis sian originon al Usono. Kaj pli kaj pli da indicoj pruvas, ke la hispana gripo ne originis en Hispanio.
Rilate al COVID-19, esti la unua kiu raportis la viruson ne signifas, ke la viruso originis de la ĉina urbo Vuhano.
Rilate al ĉi tiuj studoj, la Monda Organizaĵo pri Sano (MOS) diris, ke ĝi "tre serioze konsideros ĉiun detekton en Francio, Hispanio, Italio, kaj ni ekzamenos ĉiun el ili."
“Ni ne ĉesos scii la veron pri la origino de la viruso, sed surbaze de scienco, sen politikigi ĝin aŭ provi krei streĉiĝon en la procezo,” diris la ĝenerala direktoro de Monda Organizaĵo pri Sano (MOS), Tedros Adhanom Ghebreyesus, fine de novembro 2020.
Afiŝtempo: 14-a de januaro 2021